Albert Ostreni, autori i plagosjes që ndodhi ditën e djeshme në rrugën “Tasim Shehu”, në Tiranë vijon të jetë në kërkim. Ndërkohë, policia ka arrestuar vëllanë e tij, pasi ka fshehur provat, gëzhojën dhe DVR e kamerave te sigurisë.
Mbrëmjen e djeshme 49-vjeçari Albert Ostreni plagosi 23-vjeçarin Ronaldo Mejdani. 23-vjeçari u dërgua menjëherë në spital për të marrë ndihmën mjekësore, ndërsa Drejtoria Policisë Elbasan, vendosi një patrulle postblloku në hyrje të qytetit të Elbasanit, në rreth rrotullimin e Bradasheshit për të kapur autorin.
Ndër të tjera mësohet se ky i fundit është përdorues i lëndëve narkotike. Ngjarja dyshohet se ka ndodhur pas një konflikti të çastit, pasi personat e përfshirë kanë qenë duke luajtur me letra në shtëpinë e autorit, ku ka dy kamera sigurie që kanë filmuar pamjet, por janë marrë nga vëllai i autorit dhe janë fshehur.
Po ashtu, është marrë në polici makina tip “Audi A3”, për t’u këqyrur pasi ishte e mbyllur dhe do të verifikohet nëse në të ka sende të kundraligjshme. Në banesën e autorit janë gjetur edhe rreth 50 fishekë 9mm dhe një sasi lënde narkotike.
