Për herë të dytë brenda ditës së sotme, kreu i PD-së Lulzim Basha ka sulmuar Edi Ramën dhe qeverisjen e tij, për nivelin e krimit që ka sot vendi, e që kulmoi mesnatën e djeshme me 4 të vrarë dhe dy të plagosur në Velipojë.
Përmes një postimi në Twitter, Basha duket se i përgjigjet Erion Braçes, i cili fajësonte qytetarët për konfliktin e Velipojës, dhe thoshte se do të ishte më mirë që bregdeti të menaxhohej nga shteti dhe jo nga privati.
“Trushpëlarë, apologjistë me apo pa qira: boll akuzuat njerëzit për të keqen që ka plasur kudo! Është vetëm pasojë e modelit që sundon vendin! Peshku qelbet nga koka!”, shkruan Basha në postimin e tij në rrjetet sociale.
”Kur policia reduktohet në vegël të regjimit për të mbrojtur pushtetin dhe lidhjet me krimin, kur përgjigja e vetme sa herë përgjaken qytetet tona është “hëngshin kokat e tyre”, jeta e qytetarëve, fëmijëve dhe familjeve shqiptare është në rrezik.
Me postimin cinik si i sotmi pas masakrës së Velipojës, përgjegjësi për këtë situatë nuk e fsheh dot përgjegjësinë e tij, por vetëm rikonfirmon gjunjëzimin e shtetit para krimit të bërë njësh me pushtetin e tij të korruptuar deri ne palcë”, shkroi më herët kreu i PD-së.
