Kryeministri Edi Rama i ka përshëndetur me një “kalimera” mëngjesin e sotëm banorët e Finiqit.
Kreu i qeverisë, i shoqëruar nga shefi i ALUIZNI-t, Artan Lame ka shpërndarë lejet e legalizimeve edhe në këtë zonë.
“Shumë faleminderit dhe kalimera të gjithëve! Si je mo, kalla?”– përshëndeti Rama, ndërsa nuk kurseu qyfyret para qytetarëve, ku ka dhe një pakicë greke.
Rama tha që në këtë zonë të minoritetit grek, në 8 vitet e qeverisë së vjetër u bënë vetëm 6 legalizime, ndërsa në dy vitet e fundit janë bërë 250 legalizime falas. Ai pohoi se qeveria do të ketë në vëmendje të veçantë dy bashkitë; Dropull dhe Finiq, ku ka pakicë greke.
“Ju e shikoni vet se në këto 27 vite këtu nuk është investuar asgjë. Duhen shumë më tepër akoma, por ama me investimet tona dhe mbështetjen që do japim, dy bashkitë e minoritetet, Dropull dhe Finiq, do jenë në vëmendjen tonë. Do vazhdojmë ta mbështesim këtë bashki, qytetarët e saj, me kombësi shqiptare dhe me kombësi greke, pra shtetas me të drejta të barabarta”, tha Rama.
Nga Finiqi Rama sulmoi sistemin e drejtësisë, duke kërkuar mbështetjen e qytetarëve që më 18 qershor të nxjerrin së bashku shenjtanin nga gjykatat.
“Kaosi me pronat nuk është vetëm çështje e mungesës së vizionit dhe dashurisë për këtë vend, por rezultat i një sistemi drejtësie që ka 27 vjet që është pazar i gjësë së gjallë. E dini shumë mirë se prona që të ka lënë stërgjyshi mund të të ikë nga duart, se del një gjykatës atje, dhe veçse kur të vinë këtu pronarët e vjetër që dreqi e di se ç’lidhje kanë me zonën, por në fakt dreqi është në gjykatë. Shejtani pa bukë është në gjykatë. Duhet të nxjerrim shejtanin nga gjykatat. Është shumë e rëndësishme që ne të bëhemi të gjithë bashkë për të nxjerrë shejtanin nga gjykata. Vetting-u që i ka detyruar ata të futen në çadër bashkë me Vangjelin, nuk e di Vangjeli çfarë bën atje? Vetting-u është sot Shën Thomai, nuk është Shën Vangjeli. Shën Jorgua dhe Shën Thomai. Ça bën Vangjeli në çadër, gjumë nuk fle ai? Se unë e njoh, e kam dhe mik, por na ka ikur në drejtim të paditur. Vetëm ju mund ta sillni në rrugën e Zotit Vangjelin, ju të kishës. Ne i kemi bërë përpjekjet, por nuk funksionon, ja ka marrë mendjen shejtani”, u shpreh kryeministri.
