Në lidhje përplasjen mes Presidencës dhe KED për emërimin e radhës në Gjykatën Kushtetuese, ish-ministri i Drejtësisë, Ylli Manjani e ka parë këtë betim si një keqpërdorje apo keqshfrytëzim nga juristja Arta Vorpsi.
“Mua më vjen keq se Arta Vorpsi është një juriste shumë e mirë, ka qenë këshilltare për shumë vite në Gjykatën Kushtetuese, më vjen keq që po përdoret kaq rëndë për motive kaq banale kushtetuese. Që të shërbesh në Gjykatën Kushtetuese duhet ose të marrësh votat në Kuvend, ose të betohesh te presidenti, ose nesër kur të krijohet Gjykata e Lartë të të emërojë”, u shpreh Manjani.
Gjithashtu Manjani ironizoi zhvillimet e fundit në ngritjen e Gjykatës Kushtetuese në shkelje të hapur të ligjit.
“Në rast se Kuvendi mund të bëjë rolin e gjendjes civile dhe të kryej martesa, atëherë dhe betime të tilla mund të kryhen te noterët. Ju siguroj që një student i vitit të parë në juridik, nëse do ti kërkohej që të zgjidhte një kauzë me çështje kushtetuese, me ligjin civil do të ngelte në klasë. Nuk mund të nisësh detyrën pa bërë betimin në presidencë.
Gjykata Kushtetuese ka 9 anëtarë, 3 i zgjedh presidenti, 3 Kuvendi dhe tre Gjykata e Lartë, Marsida Xhafellari nuk është anëtarja e 10 që zgjidhet”.
Ish-ministri kritikoi dhe gjuhën e përdorur nga Taulant Balla, kreu i grupit socialit parlamentar në drejtim të zonjës Xhaferllari:
“Më vjen keq gjuha e përdorur nga zoti Balla, veçanërisht në drejtim të zonjave, më vjen keq dhe kapja që po bëhet nga shteti”, përfundoi Manjani intervistën për Fax News.
