Nga Enver Bytyçi
Kryeministri i Shqipërisë, Edi Rama ka dhënë një intervistë për portalin “Politico” dhe mes tjerash ka pohuar se “Mendoj se Serbia është në rrugën e duhur. Sigurisht, jo me shpejtësinë që ne duam. Por më besoni, skenarët e tjerë janë shumë më të këqinj për këdo dhe veçanërisht për këtë rajon”!
Çfarë shoh pas kësaj deklarate?
Së pari përkushtimin e Edi Ramës për të bërë avokatin e Serbisë dhe të presidentit të saj në opinionin publik dhe në qarqet perëndimore. Për lehtësimin e pozicionit pro-rus të Aleksandër Vuçiç. Madje përkushtim edhe për realizimin e synimeve ruse në rajon. Sepse Kremlini është gjithashtu i interesuar që Beogradi të forcojë aleancën me të e ndërkohë Serbia të mos izolohet nga ana e Bashkimit Europian. Rama e luan me mjeshtri këtë funksion avokatie. Mbron plotësisht interesin rus në raport me Serbinë dhe rajonin tonë!
Së dyti, injorimin e deklaratave anti-shqiptare të presidentit Vuçiç. Dje Vuçiç kujtoi “dëshmorët e ushtrisë serbe që ranë në Koshare, duke luftuar kundër terroristëve shqiptarë”, siç tha miku i Edi Ramës në Beograd. Presidenti I Serbisë nuk le rast pa atakuar Kosovën dhe liderët e saj. Por Ramës nuk i shkojnë në vesh këto deklarime të vëllait të tij politik e ideologjik në krye të shtetit serb.
Së treti, duket se Rama kur thotë se skenarët e tjerë janë shumë më të këqinj ka parasysh presionin që i bëhet Serbisë për të vënë sanksione kundër Rusisë. Është një presion që kryeministri ynë ua drejton Gjermanisë, Austrisë dhe vendeve të tjera, të cilat kanë ngritur zërin kundër qëndrimit të Beogradit ndaj luftës në Ukrainë. Kësisoj Edi Rama del hapur kundër pozicionit të kancelarit gjerman, Olaf Scholz dhe ministrit të Jashtëm të Austrisë, të cilët vizituan Kosovën dhe Serbinë, si dhe shfaqën qëndrimet e tyre rreth kësaj çështjeje.
