Ka përfunduar takimi i zëvendës-Ndihmës Sekretarit amerikan të Shtetit për Evropën, Matthew Palmer dhe kryetares së LSI, Monika Kryemadhit.
Takimi ka zgjatur rreth një orë dhe mësohet se ata kanë diskutuar në lidhje me situatën politike në vendin tonë.
Kryemadhi u shpreh se Palmer nuk erdhi në Tiranë për t’i dhënë zgjidhje konfliktit dhe se do të jenë shqiptarët ata që do të zgjidhin hallet e tyre.
“Palmer shprehu opsionet e veta nga këndvështrimet e tij, ne shprehëm opsionet tona në këndvështrimet tona. Përputhen sa i përket raportit të Departamentit Amerikan të Shtetit për luftën kundër korrupsionit, për kapjen e shtetit, për të gjitha problemet e tjera. Është shumë i rëndësishëm vazhdimi i mëtejshëm për zgjidhjen përfundimtare dhe për t’i dhënë fund tranzicionit shqiptar. Shqipëria e ka vendin në BE. Zoti Palmer nuk kishte ardhur për t’i dhënë zgjidhje sa i përket konfliktit. Mos harroni që hallet tona do t’i zgjidhim ne shqiptarët vetë me njëri-tjetrin. Sigurisht që mendoj se viktimat e të gjithë kësaj janë shqiptarët, nuk është kryeministri”, tha Kryemadhi.
Z.Palmer ka patur sot një axhendë të ngjeshur takimesh, atë me kryetaren e LSI-së, Monika Kryemadhi, kreun e opozitës Lulzim Basha ndërsa rreth orës 17:30 zyrtari amerikan do të pritet në Presidencë nga kreu i shtetit, Ilir Meta.
