Ka përfunduar pas 7 orësh seanca e fundit e deklarimeve të presidentit të Kosovës, Hashim Thaçi para prokurorëve të Prokurorisë së Posaçme në Hagë.
Thaçi tha se për katër ditë me radhë pati mundësinë të japë sqarimet për të gjitha çështjet që ndërlidhen me aktivitetin e tij gjatë periudhës së luftës dhe përpjekjet e tij për paqe, stabilitet, zhvillim dhe progres.
“Në rast se ata bëjnë një gjë të tillë në mënyrë profesionale të paanshme dhe të ndershme, ata shumë thjesht mund të dalin në përfundimin se unë nuk kam bërë asnjë lloj krimi apo shkelje të pretenduara. Në çdo rast, më lejoni të theksoj se lufta jonë ka qenë e drejtë, sepse ka qenë luftë për liri, pikërisht që ka qenë luftë e drejtë ne kemi pasur mbështetjen e botës demokratike SHBA-së, BE-së dhe të NATO-s, rrugëtim ky që ka zgjatur i suksesshëm, i përbashkët tash e dy dekada dhe do të jetë i përjetshëm. Pikërisht përpjekjet për të rishkruar e ritheksoj historinë, përpjekjet për të njollosur luftën tonë të drejtë janë gjithashtu përpjekje për të njollosur intervenimin humanitar të NATO-s në Kosovë. Por e vërteta e jonë e dhimbshme dhe krenare është e pastër si loti ndërsa historinë tonë nuk do të mund ta ndryshojë askush, ajo është e drejtë e pastër dhe jemi krenarë”, -u shpreh ai.
Prokuroria e Posaçme më 24 qershor publikoi njoftimin për ngritjen e akuzave ende të pakonfirmuara ndaj presidentit Hashim Thaçi dhe Kadri Veselit, si të dyshuar për krime kundër njerëzimit dhe krime lufte.
