Ish-efektivi i forcave RENEA, Arbër Paplekaj që vrau në Elbasan Pjerin Xhuvanin është një oficer karriere, i cili ka qenë pjesë e trupave shqiptare në Afganistan, por edhe në disa poste drejtuese në policinë shqiptare.
Për merita të veçanta në luftën kundër terrorizimit, ai u dekorua me certifikatë mirënjohje në vitin 2015 nga kryeministri Edi Rama. Por, jo vetëm kaq, kanë qenë të shumta për Paplekën certifikatat e mirënjohjes dhe trajnimet në misionin këshillues në Afganistan.
Pas largimit nga radhët e policisë së shtetit ai ka qenë pjesë e stafit të sigurisë së Ambasadës Amerikane në Shqipëri, por edhe truprojë i një sipërmarrësi në Tiranë. Më pas ai iu bashkua stafit të drejtuesit politik të PD-së në Elbasan në mbrojtjen e votës, sikur deklaroi Gazment Bardhi sonte.
Arbër Paplekaj është nga Tropoja dhe baba i katër fëmijëve.
