Qeveria shqiptare do të vë në dispozicion për pensionet e ish-ushtarakeve rreth 1 miliard lekë. Lajmin e bëri të ditur ministrja e Mbrojtjes Mimi Kodheli, e cila tha se ky është një premtim i mbajtur i qeverisë. Nga ky fond i qeverisë do të përfitojnë rreth 5500 ish-ushtarakë.
Kodheli: Ne kemi dhënë një premtim rreth 40 muaj më parë të vënies në vend të kthimit një detyrimi i cili ishte i bazuar jo vetëm në atë çka duhet të përfitonte kjo shtresë e shoqërisë, por edhe në një vendim të Gjykatës Kushtetuese e cila nuk u zbatua kurrë nga qeveria e mëparshme. Vendim në fakt i cili rikthente një pjesë të borxheve që shoqëria shqiptare i kishte shtresës së ish-ushtarakëve. Me këtë ligj të ri që kemi bërë, me punën e ministrit Klosi dhe me mbështetjen e të gjithë parlamentarëve që votuan këtë ligj ne kemi bërë të mundur që të përfitojnë nga ky ligj rreth 5500 ish-ushtarakë. Fatura që qeveria do të paguajë është e konsiderueshme, sepse përafron të 1 miliard lekëve dhe kjo është vetëm fillimi i të gjithë atij detyrimi që ne i kemi kësaj shtrese të shoqërisë.
