Partia Drejtësi Integrim dhe Unitet po ndjek me vëmendje dhe shqetësim situatën e krijuar në vend pas vendimit të pakonsultuar e arrogant për vendosjen e një tarife të papërballueshme për “Rrugën e Kombit”.
PDIU vëren me shqetësim përshkallëzimin dhe rëndimin e situatës dhe i bën thirrje mazhorancës:
Të heqë tarifën prej 5 euro për autoveturat dhe 22 euro për kamionët në “Rrugën e Kombit”.
“Rruga e Kombit” nuk është biznes, por arteria kryesore që lidh dy pjesët e një kombi që padrejtësitë historike i ndanë, por që ne s’mund t’i ndajmë akoma me politika të tilla, kur qytetarët e Shqipërisë paguajnë disa herë për rrugët nëpërmjet pagesës së Taksës së Qarkullimit, Taksë-Regjistrimi dhe Akcizë mbi karburantet. Kjo tarifë do të godiste atë që kemi më shumë nevojë; rritjen e shkëmbimeve tregtare me Kosovën, ku shkëmbimet e Shqipërisë me Kosovën janë rreth 140 milionë euro në vit, kurse të Kosovës me Serbinë janë mbi 460 milionë euro në vit.
Kjo tarifë do të godiste rëndë turizmin e shqiptarëve të Kosovës, i cili sjell vitalizim dhe rritje të ekonomisë shqiptare.
Ky është një hap tjetër në vazhdën e pengesave që krijojmë me Kosovën, si barriera e tarifave doganore apo kriza qesharake për patatet, çimento a specat dhe i gjithë ky absurd ndodh, kur folklorizmi patriotik i pushtetarëve bërtet për Bashkim Kombëtar.
Për rrugët kombëtare duhet të vendoset një tarifë e arsyeshme në përputhje me nivelin e të ardhurave të shqiptarëve.
Për PDIU-në, “Rruga e Kombit” dhe “Rruga e Arbërit” DUHET TË JENË PA PAGESË.
Këto janë dy arterie që lidhin shqiptarët e Shqipërisë, Kosovës dhe Maqedonisë.
Por, po kaq të rëndësishme janë këto dy arterie për Qarkun e Kukësit dhe Dibrës, si dy nga qarqet më të varfëra të vendit dhe të pa integruara në ekonominë e vendit.
PDIU shpreh mbështetjen dhe respektin për banorët e Kukësit që i dhanë leksion klasës politike shqiptare dhe opinionit publik, sepse qytetarët kanë të drejtë të reagojnë, kur arroganca e kësaj mazhorance as nuk i pyet e as nuk i informon.
PDIU kërkon lirimin e 11 protestuesve nëpërmjet heqjes së intimidimit që mazhoranca po i bën prokurorisë e gjykatës, me rrethime policore dhe urdhra politike.
Këta njerëz janë minimalisht, siç e pranon dhe Kryeministri, viktima të mosinformimit nga qeveria të një vendimi aspak profesional e transparent.
PDIU i bën thirrje klasës politike shqiptare për një Pakt Kombëtar e dakortësi të munguar në këtë tranzicion të gjatë për:
– Integrimin europian me një agjendë të dakortësuar nga të gjithë.
– Implementimin e reformës në drejtësi, ku politika duhet t’i mbajë duart larg.
– Për një ligj të ri për referendumet, që do t’i mundësonte qytetarëve të ushtronin demokracinë direkte e të vendosnin për taksat, ambientin, planet urbane etj.
Kjo do të ishte e vetmja zgjidhje në kushtet, kur demokracia me përfaqësim nuk është funksionale dhe është uzurpuar nga kryetarët e partive.
– Për reformën elektorale që mbahet peng nga dy partitë e mëdha.
