Partia Demokratike deklaroi sot se pas uniformës së re të policisë, fshihet një korrupsion prej 1.1 miliardë lekësh. Kreu i Departamentit të Sigurisë në PD, Enkelejd Alibeaj, tha se procesi i tenderimit të uniformave të policisë është kryer në mungesë të plotë transparence, duke akuzuar ministrin Tahiri për aferë korruptive me këtë tender.
“Një aferë e pastër korruptive, ku 1.1 miliardë lekë doroviten duke i ndarë me klientin e ministrit. Paratë e shqiptarëve trajtohen si të ishin portofoli privat i Tahirit. Ky ministër që po bën krenar shefin e tij dhe në lëmin e korrupsionit, nuk e ndjen si detyrim të respektojë ligjin dhe procedurën, as të japë llogari. Ashtu siç nuk u përgjigj edhe mbrëmë, kur publikisht në sytë e shqiptarëve u pyet në “top story” për lidhjen e tij me Emiliano Shullazin”, tha Alibeaj.
