Partia Demokratike ka publikuar sot pamje të parcelave të mbjella me kanabis që sipas saj gjenden në luginën e Lumit të Vlorës. Ervin Salianji, Sekretari për Aksionin Qytetar në Partinë Demokratike, tha se kjo është dëshmia e mbushjes së vendit me drogës dhe rritjes së biznesit kriminal drejtohet nga ministri i Brendshëm.
Salianji: 30 për qind e fitimit të çdo bime të mbjellë, ndahet mes shefave të policisë dhe Tahirit. Ky është pazari që garanton mbjelljen, rritjen, korrjen dhe transportin e drogës. Pamjet janë filmuar pikërisht në zonën e Lumit të Vlorës, aty ku habilajt e Tahirit kanë kontroll absolut mbi territorin.
Parcela pa fund që lulëzojnë, që sjellin qindra milionë euro për bandat e trafikantët, për njerëzit e afërt të Tahirit, i cili, përveç shumë garancive të tjera, u dha habilajve edhe makinën e tij private, taksinë e drogës AA003GB, për tu siguruar paprekshmëri e semafor jeshil për lëvizjet e tyre. Kjo pra është dëshmia e gjallë e krimit të veshur me pushtet e pushtetit të veshur me krim.
Menjëherë ka reaguar policia e shtetit e cila ka pohuar se pamjet janë siguruar prej saj dhe se opozita po u bën jehonë aksioneve të Policisë së Shtetit..
“Pamjet që u transmetuan sot nga PD janë filmuar nga vetë Policia e Shtetit si pjesë e punës intensive për dosjen hetimore përkatëse. Bazuar mbi këto hetime (përfshirë edhe pamjet) u zhvillua aksioni për asgjësimin e këtyre bimëve narkotike dhe vënien para përgjegjësisë ligjore të autorëve të shkeljes së ligjit. Ndërkohë, Policia e Shtetit bën me dije se kanë nisur verifikimet dhe do të vihen përpara përgjegjësisë ligjore e penale të gjithë punonjësit e policisë, të cilët kanë nxjerrë sekretin hetimor, duke ekspozuar detaje të një dosje në hetim”, thuhet në reagim.
