Grupi parlamentar i Partisë Demokratike është mbledhur sërish pasditen e sotme për çështjen më të nxehtë të aktualitetit, reformën në drejtësi.
Mbledhja që ka nisur rreth orës 18 e 20, pritet të sjellë edhe një qëndrim më afër zgjidhjes të Partisë Demokratike. Raportohet se në mbledhje është i pranishëm është ish-kryeministri Sali Berisha.
Deputetja Majlinda Bregu ka deklaruar në mbledhjen e grupit se PD duhet të votojë reformën në drejtësi dhe të mos presë Metën. Ajo tha se PD nuk mund t’i shpallë luftë ambasadës amerikane.
“Duhet të dalim me një zgjidhje. Duhet të votojmë reformën në drejtësi. Ne sot jemi nevojtarë edhe për të vendosur veten në kahun ku kësaj partie i takon të jetë. Nuk mund të fshihemi pas detajeve. Ne nuk mund t’i shpallim luftë ambasadës. Le t’i lëmë përrallat me diversantë. Ne duhet të votojmë. Ne nuk mund të presim deklaratat e Metës për të vendosur çdo bëjë PD”, ka thënë Bregu.
Ndërsa deputeti Eduard Selami i është drejtuar kreut të PD-së, duke i kujtuar premtimin se pas nenit 88 do votonte reformën.
“Na keni futur në kurthin e sherrit me ndërkombëtarët. Premtove që pas nenit 88 do e votoje. Nuk e kuptoj pse nuk e jepni zgjidhjen?”, i është drejtuar Selami Bashës.
Ditën e djeshme kryeministri Edi Rama, kreu i PD-së, Lulzim Basha si dhe kreu i Kuvendit, Ilir Meta u takuan për gjetjen e një zgjidhjeje konsensuale për reformën në drejtësi. Deri në orët e para të mëngjesit të sotëm kanë zgjatur negociatat mes ekspertëve të maxhorancës dhe opozitës, ndërsa Basha deklaroi se kanë ngelur vetëm 2 çështje për t’u dakordësuar.
