Sipas Partisë demokratike, taksa që banorët e Tiranës paguajnë çdo vit rreth 7.5 milionë euro për arsimin, po shpërdorohet dhe kjo është kuptuar më së miri pas ngjarjeve të tërmetit.
Sipas PD-së, Bashkia e Tiranës nuk e përdor atë për të përmirësuar infrastrukturën në shkolla e kopshtet, duke lënë në mëshirën e fatit sigurinë e jetës së fëmijëve.
Ish-deputetët Jorida Tabaku dhe Klevis Balliu sollën në vëmendje situatën me shkollat “Musine Kokalari” dhe “Lasgush Poradeci” në zonën e Kombinatit.
Në këto shkolla mësimi është pezulluar dhe nuk ka patur asnjë akt ekspertimi të plotë qoftë nga Bashkia apo institucionet përgjegjëse.
“22 milionë euro janë mbledhur nga viti 2016 deri më sot për taksën e infrastrukturës në Arsim, 22 mln euro që duhej të ishin investuar në shkolla, në kopshte, në çerdhe, ndërkohë që Tirana, megjithëse pasojat e tërmetit nuk ishin si në zonat e prekura më rëndë, ka numër të madh të shkollave, të dëmtuara nga tërmeti”, tha Tabaku.
Nga ana e tij, Klevis Balliu nga shkolla “Lasgush Poradeci” në Kombinat tha se paratë e qytetarëve të cilat shkojnë për infrastrukturën arsimore janë vjedhur, pasi në këtë shkollë nuk është bërë asnjë investim dhe për pasojë shkolla është mbyllur.
“Në këtë shkollë pak kohë më parë janë bërë disa punime për lyerje bojërash, të cilat i shërbejnë për propagandë dhe fotografi Bashkisë së Tiranës, por nuk është bërë asnjë punim serioz duke bërë matjet e duhura dhe të parashikuara me ligj”, u shpreh Balliu.
