Partia Demokratike ka dalë sot për të denoncuar pasurimin e zëdhënëses së qeverisë Elisa Spiropali dhe familjes së saj.
Pak ditë më parë në emisionin “Open” në Top Channel, sekretari i përgjithshëm i PD-së Gazmend Bardhi denoncoi se vëllai Elisa Spiropalit, zëdhënëses së qeverisë ka përfituar 550 milionë lekë nga fondet publike. Këtë të martë deputetja Jorida Tabaku dhe Lealba Pelinku e departamentit antikorrupsion shpjeguan me detaje akuzën ndaj Spiropalit dhe familjes se saj.
“Duke ndjekur paratë, është zbuluar një skemë skandaloze korrupsioni, konflikti interesi dhe fshehje pasurie, ku përfshihet drejtpërsëdrejti Elisa Spiropali, zëdhënëse e qeverisë, bashkëshorti i saj, Salarjon Totaj, ish drejtor i Ujësjellësit Fier, vëllai i Elisa Spiropalit, Enkli Spiropali dhe kushëriri i bashkëshortit të saj, Marjus Memushaj”, tha Tabaku.
Sipas demokratëve, historia nis në shtator të 2013 kohë kur Elisa Spiropali ishte drejtoreshë e doganave, dhe vëllai i saj, Enkli Spiropali krijoi kompaninë Solomon.
“550 milionë lekët janë marrë me tendera të vegjël, që nuk tërheqin vëmendjen. Me tendera 6-7 milionësh, bashkëshorti i Elisa Spiropali i ka dhënë kompanisë së krijuar nga kunati i tij, vëllai i Elisës rreth 350 milionë lekë”, u shpreh Pelinku.
“Më e pakta që duhet të ndodhë sot, është angazhimi i menjëhershëm i Inspektoratit të Pasurive për të hapur një hetim pasuror për Elisa Spiropalin”, tha Tabaku.
Për akuzat, reagoi vetë Spiropali. Duke hedhur poshtë sulmet, zëdhënësja e qeverisë siguroi se vëllai i saj nuk kishte përfituar asnjë kontratë apo fond publik as kur ishte drejtoreshë dhe as tani që është ministre.
Spiropali paralajmëroi se do padisë akuzuesit ndërsa me paratë e fituara do të ndihmojë kopshtin e Kolonjës./T.CH
