Pas deklaratave të forta të drejtorit të përgjithshëm të Juves, Mauricio Arrivabene, i cili u shpreh se klubi ka vendosur që ta ulë ofertën për Dybalën nga 8 në 7 milionë euro neto, plus 2 milionë të tjera bonuse, ka ardhur dhe reagimi i yllit juventin.
Këto fjalë e kanë irrituar shumë sulmuesin argjentinas.
Të paktën sipas asaj që raportoi dje në mesnatë rrjeti “TyCSports”, futbollisti bardhezi duket se i ka raportuar klubit se nuk ka më ndër mend që të rinovojë marrëveshjen me “Zonjën e Vjetër” dhe do të nisë të vlerësojë ofertat tani e në vazhdim.
Sipas televizionit argjentinas, jo vetëm oferta në ulje, por edhe kritikat e vazhdueshme në kohët e fundit nga drejtori i përgjithshëm kanë nervozuar tepër numrin 10 bardhezi, i cili tani më shumë se kurrë rrezikon që të largohet me parametër zero nga Torino, një luks që Juventusi nuk mund ta përballojë dhe duhet ta shmangë me çdo kusht.
