Pas batutës “këtu afër është pylli, mund të shkoni nëpër pemë dhe të fishkëlleni” së kryeministrit Edi Rama gjatë aktivitetit ditën e djeshme me të rinjtë në Ditën e Rinisë, ka reaguar ish-deputeti i PD-së, Astrit Patozi.
Me anë të një postimi Patozi ironizon Ramën, duke i thënë “mos i trego bilbilit pyllin, por përpiqu të dalësh vet nga pylli”.
Postimi i Patozit
MOS I TREGO BILBILIT PYLLIN
I dashur timonier,
Kërkoj ndjesë që e mora vesh me vonesë lajmin për fishkëllimat e djeshme në Pallatin e Sportit. Më falet, gjithsesi, dhe jam i justifikuar në një farë mënyre, se kam qenë i zënë me festimet e Ditës së Rinisë.
Por tani, që e pashë, një këshillë po ta jap. Kur të fillojë ajo lloj muzike, mos u mundo kot t’u tregosh bilbilave ku janë pemët, por përpiqu të gjesh një shteg për të dalë vetë nga pylli.
Se i bie se ka nisur që për ty të këndohet ajo kënga, që kishte interpretuar mbrëmë jo keq Ditmir Bushati “Pranvera filloi me ardhë, dhe bylbyli nis me knu…”
