Nesër besimtarët ortodoksë festojnë Pashkët, ringjalljen e Krishtit. Para ditës së madhe, ata kremtojnë të premten e zezë, ritualin e kalimit nën epitaf dhe procesionin e Krishtit. Besimtarët ortodoksë të Korçës, Fierit, Vlorës dhe morën pjesë në ceremoninë e shëtitjes së Epitafit të Krishtit në qytetet tyre.
E premtja e zezë në Korçë u kremtua nga besimtarët ortodoksë, në ceremoninë e përvitshme, organizuar nga Mitropolia e Shenjtë. Rituali i kalimit nën epitaf dhe procesioni i varrimit të Krishtit, mblodhën para Katedrales shumë besimtarë.
Për ngjalljen e Krishtit, besimtarëve korçarë iu bashkuan edhe qytetarë të shumtë, të cilët shoqëruan procesionin përgjatë ecjes në rrugët kryesore të qytetit. Ceremonia u përcoll nga marshe, ndërsa epitafet e shtatë kishave u ribashkuan për t’u kthyer sërish tek Katedralja.
I shoqëruar me dhjetra besimtarë, Epitafi përshkoi rrugën nga Kisha e Shën Gjergjit në qendrën e qytetit të Fierit ne pedonale dhe për tu kthyer me pas në kishë për të pritur atje besimtarët natën e Pashkëve. E Premtja e Madhe, apo e Premtja e Zezë është dita kur kujtohen vuajtjet dhe vdekja e Krishtit.
Edhe në Vlorë besimtarë ortodoksë kanë kremtuar të Premten e Zezë. Gjatë pasdites, nga kisha e Shën Theodhorit është organizuar riti i kalimit nën epitaf dhe varrimi i Krishtit, pjesë e të cilës janë bërë qindra qytetarë të Vlorës.
Me një marshim të heshtur, qindra persona kanë bërë parakalimin tradicional në rrugët kryesore të qytetit ku procesionin e ka udhëhequr At Konstandin Prifti.
