Kanë kaluar disa orë nga ngjarja e rëndë në Himarë dhe kabineti qeveritar i Ramës, po kujtohen të tani të reagojnë. Ministrja e Shtetit për Marrëdhëniet me Parlamentin, Elisa Spiropali ka reaguar me anë të një postimi në Facebook, ku shkruan se papërgjegjshmëria e një polici i mori jetën të miturës. Po ashtu ajo ka kërkuar një hetim të shpejtë dhe të drejtë për ngjarjen.
“Ngjarja tragjike e Potamit na ka tronditur dhe lënduar të gjithëve. Një vajzë shtatë vjeçare humbi jetën e përplasur barbarisht nga një gomone. Nesër ajo mund të ishte muzikante, shkrimtare, politikane, mjeke, apo edhe thjesht bijë e një nëne dhe prind fëmijësh. E vrau papërgjegjshmëria. E vrau dalldia. Ia preu në mes jetën krimi i dikujt që moskontrolli i vetes e shndërroi nga polic, në vrasës. Nxis një hetim të shpejtë dhe të drejtë.
Hetim që jo thjesht të dënojë shkaktarin e një krimi kaq makabër, por edhe të dëshmojë se vepra të tilla kriminale do të dënohen me rreptësinë më maksimale të ligjit. Të gjitha institucionet e sigurisë duhet të ngrihen në këmbë që kjo ngjarje e rëndë të mos përsëritet kurrë dhe askund në bregdetin tonë”, shkruan ajo. Ndërsa në përfundim ka shprehur ngushëllimet për familjarët e 7-vjeçares që humbi jetën sot.
