Kryetarja e LSI-së Monika Kryemadhi ka kërkuar sot përjashtimin e kryeministrit të vendit Edi Rama nga Parlamenti, pas deklaratave të tij.
Ajo e quajtur fjalorin e kryeministrit të denjë për një rrugaç, e përçmues ndaj vëllezërve kosovarë prandaj edhe kërkoi përjashtimin e tij.
“LSI është me qytetarët e Kukësit dhe mbështet protestat e qytetarëve, që protestojnë dhe do protestojnë kundër zhvatjes që po ju bën qeveria e Ramës. Rama dhe oborri i tij arrogant nuk e kuptojnë që shqiptarët janë ngritur kundër regjimit skllavërues me krimin dhe bandat, që duan t’iu rrëmbejnë dinjitetin shqiptarëve. Fjala e tyre para shqiptarëve ishte fyerje për ta, shprehje e antikombtarizmit të tij, që i trajton kosovarët si pjesë e pazarit. Sot ne distancohemi dhe e dënojmë me forcë deklaratën e tij, fjalorin e tij prej rrugaçi, për fyerjen ndaj vëllezërve tanë.
Ne kërkojmë përjashtimin e Ramës nga parlamenti për shfaqjet e shëmtuara. Qëndrimi ynë ndaj Parlamentit do jetë vendimmarrje politike. I bëjmë thirrje policisë dhe prokurorisë të jenë të kujdesshme në veprimet e tyre. Prokuroria të hetojë pa marrë në mbrojtje provokatorët. Të hetojë kontratën dhe gjithë procesin e lidhjes së saj. Çdo keqinterpretim do ketë pasoja. Jemi në kontakt me situatën që është krijuar, kemi parësore gjendjen e të ndaluarve që mbahen në komisariate. Protesta është e drejtë e qytetarëve dhe askush nuk mund ta cënojë këtë”, tha Kryemadhi.
