Skuadra e Sormanit barazoi 1-1 me Ferencvaroshin në “Elbasan Arena”, por pas golit, Realdo Fili i kishte mundësitë për ta dyfishuar avantazhin e të kuqve
Partizani nuk ia del dot të fitojë në “Elbasan Arena” ndaj Ferencvaroshit, në ndeshjen e turit të dytë paraeleminator të Champions League. Shanset ishin, por vetëm 1-1, me një gol të shkëlqyer të Realdo Filit në të 47’, por që u barazua 23 minuta më vonë nga Daniel Bode. Ndeshja filloi dhe u shoqëruar gjatë të gjithë 90 minutëshit me një atmosferë entuziaste, ndërkohë që presidenti i Partizanit, për të siguruar mbështetjen e tifozëve kishte sponsorizuar udhëtimin e tyre.
Përballë nënkampionëve tanë ishte një skuadër e përbërë nga 8 futbollistë që luajnë në Kombëtaret e vendeve të tyre (6 me Hungarinë, 1 me Sllovakinë dhe 1 me Ekuadorin), si dhe ka një buxhet rreth 40 milionë euro. Por në fushën e lojës, në pjesën më të madhe tanët ishin më shumë se të barabartë, madje veç golit kishin edhe raste të tjera shënimi, siç ishte ai me autor sërish Filin në të 62’, kur futbollisti i ardhur nga Apolonia i kishte të gjitha mundësitë për ta dyfishuar avantazhin. Sormani kishte në fushë një skuadër të mirëvendosur dhe me dëshirë të madhe, megjithëse gjatë pjesës së dytë filluan të dalloheshin edhe diferencat teknike midis dy ekipeve. Trajneri ynë përveç Atandës, të cilit për të hyrë në fushë iu deshën plot 5 minuta të ndërrohej, i dha disa minuta edhe dy blerjeve të reja, Ekuban dhe Volash, madje ky i fundit hyri direkt nga pankina, pa asnjë minutë nxemje. Tani le të presim edhe të paktën 90 minuta të tjera, në një mision të vështirë në Budapest.
