Gjatë takimit të zhvilluar sot me përfaqësuesit e trupave diplomatikë pranë Selisë së Shenjtë, Papa Françesku i bëri thirrje lidërve qeveritarë e fetarë të botës të bashkohen kundër terrorizmit fondamentalist, i cili mund të mundet vetëm falë impenjmit të përbashkët të të gjithëve.
Duke folur sot në Vatikan, kreu i Kishës Katolike tha se është për keqardhje që religjioni ende po përdoret “si pretekst për refuzim, margjinalizim dhe dhunë”.
Ai e ka kritikuar “terrorizmin e inspiruar nga fondamentalizmi”, duke e përshkruar si “çmenduri vrasëse që e keqpërdor emrin e Zotit”, me qëllim “për dominim dhe fuqi”.
Po ashtu, Papa Françesku, u ka bërë thirrje qeverive në gjithë botën që të bëjnë më tepër në luftimin e varfërisë, pasi sipas tij, ajo e mundëson lulëzimin e fondamentalizmit”.
