Autoritetet kineze kanë bërë deklaratën e parë zyrtare nga në lidhje me origjinën e koronavirusit. Sipas Pekinit zyrtar virusi është shpërndarë nga Shtetet e Bashkuara.
Një nga zëdhënësit e ministrisë së jashtme kineze, Zhao Lijian, shkroi në Twitter “Mund të ishte ushtria amerikane që solli epideminë në Wuhan”.
Referenca shkon për lojërat ushtarake të zhvilluara në qytetin kinez në tetor 2019. Amerikanët kanë marrë pjesë në këto lojëra me 300 ushtarakë.
Tetori është pikërisht periudha që shkencëtarët e kanë identifikuar si koha e inkubacionit të famëkeq COVID-19, i cili në fakt daton në vitin 2019 dhe jo në vitin 2020.
Përballja e re mes Pekinit dhe Uashingtonit buron nga deklaratat e Këshilltarit të Sigurisë Kombëtare të Shtëpisë së Bardhë, Robert O’Brien se Kina ka vepruar ngadalë në adresimin e epidemisë dhe nëse do të kishte “ndjekur protokollet e konsoliduara” bota do të kishte edhe dy muaj të tjera për t’u përgatitur.
Zhao Lijian iu referua dëgjesës publike të mbajtur nga drejtori i Qendrave Amerikane për Kontrollin dhe Parandalimin e Sëmundjeve, Robert Redfield, ku ky i fundit pranoi se qytetarë amerikanë që me sa duket vdiqën nga gripi më pas u testuan pozitiv për koronavirus. Gjatë dëgjimit, Redfield foli për 34 milionë raste të gripit dhe 20,000 vdekje në Shtetet e Bashkuara.
Zëdhënësi i Ministrisë së Jashtme kineze shkroi në Twitter: “Kur u shfaq pacienti zero në Shtetet e Bashkuara? Sa njerëz janë infektuar? Cilat janë emrat e spitaleve? Mund të ishte ushtria amerikane ajo që solli shpërthimin në Wuhan? Jini transparentë. Bëni të dhënat publike. Shtetet e Bashkuara na kanë borxh një shpjegim!”.
Sipas “The Guardian”, teza dalë në pah javët e fundit, pasi një epidemiolog i respektuar, Zhong Nanshan, deklaroi në një konferencë për shtyp në 27 shkurt se megjithëse virusi u shfaq për herë të parë në Kinë “ai mund të mos ketë lindur në Kinë. “.
Zhong më vonë sqaroi pretendimin e tij, duke thënë se vendi i parë që zbulohet një sëmundje nuk është “ekuivalenti i të qenurit burim”. Ai u tha gazetarëve: “Por ne, as nuk mund të konkludojmë se virusi erdhi nga jashtë. Vetëm përmes hetimeve dhe gjurmëve mund t’i përgjigjemi kësaj pyetjeje”.
