Shefi i stafit të kancelares gjermane, Angela Merkel, tha se pret që vaksinimi kundër koronavirusit në Gjermani të nisë në ditët e para të vitit të ardhshëm. Mësohet se vendimi nga Autoritetet e Bashkimit Evropian pritet të merret deri më 29 dhjetor.
Shefi i stafit të Merkelit, Helge Braun, i cili edhe vetë është mjek, tha për gazetën Bild se është i gatshëm t’i ndihmojë autoritetet mjekësore. Braun tha se ai dhe kancelarja Merkel do të vaksinohen “kur t’iu vijë radha”.
Të hënën, autoritetet shëndetësore raportuan për 12.332 raste të reja me koronavirus. Masat kufizuese, të tilla si mbyllja e restoranteve, bareve dhe objekteve sportive, pritet të zgjasin së paku deri më 10 janar. Braun tha se duhen kufizime më të rrepta “së paku në vatrat” e shpërthimit të koronavirusit.
