Nga Shqipëria 2 kompani, 3 përfitues dhe 22 pronarë aksionesh
Shqipëria është e pranishme në skandalin ndërkombëtar “Panama Papers”. Lidhjet e vendit tonë me këtë operacion gjigand i ka zbuluar media izraelite “Haaretz”. Sipas kësaj medie avokati hebre që ka dhe shtetësi shqiptare Assaf Halkin, përmes firmës ligjore panameze ka themeluar kompaninë GFI Technologies, e regjistruar në maj të vitit 2013 në ishullin e Anguilla, në mënyrë që të investojë në kompanitë shqiptare të teknologjisë së lartë. Halkin përmendet së bashku me një shqiptar tjetër i quajtur Ismail Mulleti si pronarë të kompanisë. Pjesë e kompanisë GFI Technologies është edhe GFI Albania, e cila mori në Shqipëri koncesionin e markimit të karburanteve nga qeveria Berisha, një kontratë 10-vjeçare që kushton 150 milionë euro. Pikërisht në kohën kur mori koncesionin kompania rezulton të jetë regjistruar edhe në Panama pranë kabinetit Mosac Fonceca.
Referuar disa dokumenteve të QKR-së, avokati hebre Halkin dhe Ismail Mulleti rezultojnë të kenë ngritur në Shqipëri edhe kompaninë IMAH me seli në qendrën e biznesit në rrugën “Murat Toptani”. Shoqëria e themeluar në shkurt të vitit 2014 ka për administratore Entela Shehaj. Aty Ismail Mulleti dhe Assaf Halkin janë me pjesë të barabarta nga 45 për qind.
Ismail Mulleti njihet si biznesmen dhe ndërtues në fillim të viteve 90′, por edhe si ish-aksioner i një hoteli të rëndësishëm në Tiranë. Ndërkohë në mediat vendase po përflitet se Ismail Mulleti kishte lidhje me elitën politike të Tiranës. Ndërkohë ende nuk ka të dhëna për shqiptarë të tjerë të përfshirë në këtë skandal global financiar.
Deri tani janë zbuluar emra të politikanëve botërorë dhe figurave publike që fshehin paratë në Panama për të shmangur detyrimet nga taksat në vendet e tyre. Plot 11 milionë emaile të zbuluara nga arkivat e kabinetit panamez Mossack Fonseca, tregojnë se si i fshehin paratë përmes shoqërive offshore, politikanët, njerëzit e krimit, sportistët dhe miliarderët që duan t’i fshihen taksave.
