Turqia prej gati një jave po lufton për shuarjen e vatrave masive të zjarrit që kanë përfshirë vendin. Mediat e huaja shkruajnë se për shkak të flakëve qielli në territorin turk është bërë i kuq dhe turistët kanë filluar që të largohen me varka nga deti.
Ministri i Bujqësisë dhe Pyjeve Bekir Pakdemirli ka bërë me dije se 119 nga 125 vatrat e zjarrit që kanë shpërthyer në 32 provinca që prej 28 korrikut janë shuar ose janë marrë në kontroll, por 7 vatra të tjera vijojnë.
Ndërkohë deri më tani si pasojë e flakëve të zjarrit kanë humbur jetën 8 persona. Ndërkaq hotelet kanë mbyllur dyert dhe turistët janë evakuuar nga Bodrumi dhe Marmaris me varka private duke arritur të shpëtojnë nga flakët të cilët u afruan bregut.
“Kemi parë zjarre por kurrë kështu” thotë një turiste ndërsa po evakuohet me të tjerët.
Hetuesit po përpiqen të përcaktojnë nëse disa nga zjarret janë shkaktuar me qëllim. Ndërkohë një person është ndaluar si zjarrvënës.
