Nënkryetari i Partisë Demokratike, Edi Paloka, është shprehur në një intervistë se me 30 qershor ose do të triumfojnë qytetarët dhe demokracia, ose do të instalohet dhe një herë diktatura.
Në një intervistë për “Koha Jonë”, Paloka i pyetur për sinjalet që u dhanë në Berlin për çështjen e Integrimit të Shqipërisë në BE, thotë se: “Problemi është se ndryshe nga Zaev që deklaroi se do të jepte dorëheqje nëse vendit të tij nuk i hapeshin negociatat, Rama është gati të çojë në humnerë Shqipërinë vetëm të mos e lëshojë karrigen”.
Ndërsa për zgjedhjet e 30 qershorit, ai thotë se: “Ose do të triumfojnë qytetarët dhe demokracia, ose do të instalohet dhe një herë diktatura. Kjo është luftë për ekzistencë, po e them përsëri”.
Lidhur me protestat e radhës, Paloka shprehest se: “Protestat janë mjeti për të arritur një qëllim. Qëllimi i opozitës së bashkuar, tanimë është i shpallur; krijimi i kushteve për zgjedhje të lira e të ndershme. Që të ketë zgjedhje të lira e të ndershme, në radhë të parë duhet vullnet politik nga qeveria, e cila ka mekanizmat për të lejuar ose penguar që zgjedhjet të jenë të tilla”.
/Koha Jonë/
