Osmani pas takimit me Pendarovskin: Zë i qartë për liberalizimin e vizave të Kosovës

0
75

Presidentja e Kosovës, Vjosa Osmani ka pritur sot presidentin e Maqedonisë së Veriut. Pas takimit zyrtar me Stevo Pendarovski, Osmani ka shprehur se vizita e tij është nder dhe privilegj i madh për Kosovën, duke theksuar se mes vendit të saj dhe Maqedonisë së Veriut janë janë nënshkruar rreth 40 marrëveshje.

Osmani tha se roli i shqiptareve në Maqedoninë e Veriut është i madh dhe se ata shërbejnë si një urë lidhëse në mes të vendeve. Gjithashtu ajo e ka falenderuar presidentin Pendarovski për mbështetjen e tij për Kosovën përgjatë gjithë viteve sa ka shërbyer dhe vazhdon që të shërbejë tani si president. Ajo ka theksuar se presidenti i Maqedonisë së Veriut ka qenë një zë i qartë në BE për liberalizimin e vizave të Kosovës.

“Kjo vizitë jo vetëm që hap kapituj të ri të bashkëpunimit por konfirmon marrëdhëniet tashmë të shkëlqyera të Kosovës me Maqedoninë e Veriut. Kemi nënshkruar mbi 40 marrëveshje ndërkombëtare, disa memorandum ndërministrore si dhe nisma të tjera për marrëveshje të tjera që janë në proces të finalizimit. Shqiptarët e Maqedonisë së Veriut janë një urë lidhëse e fortë në mes të dy vendeve tona dhe dy popujt tona kanë lidhshmëri të madhe, bashkëpunim të madh në shumë fusha përfshirë bashkëpunimin, kulturor, tregtar e të tjera që ne synojmë që t’i shtyjmë përpara. Përkundër faktit që Kosova i ka plotësuar të gjitha kushtet për liberalizimin e vizave, BE-ja ende nuk e ka përmbushur premtimin. Me këtë rast e falënderoj presidentin Pendarovski që ka qenë zë i qartë për liberalizimin e  vizave për Kosovën si vend fqinj”,-përfundoi Osmani pas takimit.