Disa përfaqësues të bizneseve të Vlorës kane zhvilluar një takim ditën e sotme me shefin e Komisariatit Vlorë, për të folur mbi zgjatjen e orarit të muzikës përtej orës 23:00, si edhe lejimin e aktivitetit të tyre deri në orën 02:00.
Duke folur jashtë komisariatit, njëri prej përfaqësuesve theksoi se orari më i mirë i punës në sezonin turistik është rreth orës 23:00 deri në orën 01:00, prandaj dhe nuk duhet mbyllur muzika apo aktiviteti kaq herët.
Ai paralajmëroi më tej se nëse vazhdohet me këtë mënyrë, ata do të detyrohen t’i thonë turistëve ikni në Prishtinë, sepse aty ju plotësojnë kushtet.
Një përgjigje e pati dhe për Kryeministrin Rama, teksa u shpreh se nuk ka vetëm turistë për të shijuar valën e detit sicc tha Rama, por ka dhe të tjerë që duan muzikë.
“U diskutua për moderimin e muzikës. Kërkojmë që të shtyhet në orën 12 të natës muzika dhe shtyrja e orës së punës deri në 2 të mëngjesit, akoma nuk kemi marrë një përgjigje. Na kanë dhëna shpresa se shumë shpejt do të ndodhë. Ne e ndjejmë shumë të nevojshme sidomos këtë periudhë plot me turista. Duke parë që vendet e rajonit, Mali Zi, Kosova, Greqia, Turqia, ne kërkojmë që të mos na ikë ky fluks turistësh. Mos të detyrohemi t;i bëjmë ftesën turistëve mos ejani në Vlorë por shkoni në Prishtinë, sepse atje i keni të gjitha kushteve. Sot jemi thirrur nga shefi i Komisariatit për të diskutuar këtë çështje. Ramë dakord që të gjithë se nuk jemi për zhurmë por për të bërë biznes. Nuk ka vetëm turistë për restorante apo për të shijuar valët e detit siç tha Kryeministri. Ne jemi gati edhe për të vënë një sfond me valët e detit por vetëm të lejohemi të punojmë. Në orën 12 për ne është kafsha e orarit”, tha nje perfaqesues i bizneseve te Vlores.
