Bylykbashi: Letra e sotme e Ramës per liderin e opozitës ishte për të qeshur me lot por edhe për të shkulur flokët
Lulzim Basha ka dhënë përgjigjen e tij për ftesën e Ramës për tryezë politike të nivelit të lartë. Opozita nuk e pranon ftesën e Ramës për një tryezë të nivelit të lartë politik për reformën në drejtësi. Deputeti Oerd Bylykbashi tha se letra e Ramës për Bashën kishte shkaktuar veçse të qeshura në PD por asnjë nxitje për tu ulur në bisedime
“Si rregull, në fund të një raundi të pasuksesshem negociate, thuhet: ramë dakord që të mos biem dakord. Kjo është shprehje e shpikur për të krijuar pozitivitet edhe kur nuk bihet dakord me shpresë për të vazhduar në raundin tjetër, ndërsa në shqiptarët i themi: të mbajmë veten me gajret. Por letra e sotme e Ramës për liderin e opozitës ishte për të qeshur me lot por edhe për të shkulur flokët.
Rama fton Bashën që “mosdakordësive” t’u jepet një “përmasë e munguar civilizimi” nëpërmjet një tryeze dialogu dhe kështu t’u mbushet mendja ndërkombëtarëve se jemi të civilizuar! Pra, që në ftesë Rama e ka të mbledhur mendjen për mosdakordësinë, por hallin e ka te fasada”, tha Bylykbashi.
Kryeministri Edi Rama i dërgoi sot një letër kryetarit të PD-së ku e ftonte për tu bërë pjesë e një tryeze dialogu të nivelit të lartë politik për zgjidhjen e çështjes së refomës në drejtësi.
