Nuk arritën dot në nivelin e studentëve, por u vunë në rresht dhe shkuan në Kuvend të dialogojnë. Me radhë Luli, doktori, Tritani, Fatmir Mediu ata të LSI-së, të lumtur që i shpëtuan ato mandate që do i “digjnin” gjithë vrull, vetëm një javë më parë.
Natyrisht, si në çdo dasëm që ka nevojë për aheng i mblodhën ca protestues tek sheshi para Kuvendit dhe vetë u sollën prapë si cuba. I gjuajtën me vezë dhe i dhanë atë që Edi Rama shpresonte; viktimizimin. Rama, jo vetëm ia doli ta “zgjidhë” krizën duke i trajtuar përsëri opozitarët si ortakë ekonomikë, por tani me sjelljen e opozitës do bëjë viktimën, për të cilën duhet të na vijë keq.
Lul Basha përsëri nuk heq dorë nga kërcënimet, kur i hakërrehet Ramës për Ridvan Boden, për të cilin mendon se është i kapur nga kryeministri, kur dhe vetë si Ridvani u vu në rresht nga “sulltani”. Ja si kërcënon Luli: “Pse e ke bërë atë? Vetëm banka ka ngel pa kap, kape dhe bankën, kape! Gjitha të tjerat i ke kapur, kape dhe bankën, por do e shihni se ku do përfundoni!”.
Ku do të përfundojë? Aty ku është sot, aty ku janë të gjithë sot. I gjuajnë me vezë, por e lartësojnë në pushtet sa herë ka nevojë për oksigjen. Prapë ia dhanë me bujari, sepse zgjodhën biznesin, para misionit.
Pastaj Edi Rama është i ndërgjegjshëm që një opozitë pulash, vezë ka për të prodhuar.
