Ish ministri i Drejtësisë, Eduard Halimi ka komentuar sërish raportin paraprak të Komisionit të Venecias në lidhje me shkarkimin presidentit Ilir Meta.
Në një intervistë për Syri.net, Halimi shprehet se opinioni i Komisionit të Venecias nuk e thotë në asnjë paragraf të sajin se, cilin nen apo paragraf të Kushtetutës ka shkelur presidenti i Republikës Ilir Meta.
“Termi tejkalim nuk njihet nga Kushtetuta. Në fjalorin shqip shqip, ka të bëjë me tejkalim shpejtësie, apo ti marrësh kompetencat dikujt tjetër. Sipas Kushtetutës, i vetmi institucion, është presidenti.
Shkelje, në bazë të fjalorit, do të thotë të dhunosh një nen apo paragraf të Kushtetutës. Nga ajo që kam lexuar unë, nuk gjej një cilësim të tillë, që presidenti i Republikës, me shtyrjen me 100 ditë të zgjedhjeve të ketë shkelur një nen apo paragraf të Kushtetutës. Për sa kohë nuk kemi shkelje, nuk mund të flasim për shkelje të vogël apo të madhe”, shprehet Halimi.
