Operacioni i quajtur “Shefi” dhe “Kulmi”, i cili që në emër dyzoi opinionin publik në lidhje me suksesin e SPAK dhe Antimafias Italiane. Sot, ky ka qenë kryelajmi.
Si asnjëherë tjetër në këto vite, ky Operacion dyemëror nuk u shoqërua me njoftim të hollësishëm për shtyp, për të detajuar kur ka nisur, si e qysh janë sekuestruar sasitë e drogës dhe kur e sa persona janë arrestuar.
Konferencat për shtyp me italianë në Shqipëri e me shqiptarë në Itali, thjesht parashtruan se në këtë operacion gjithsej u arrestuan 37 persona e u sekuestruan tre ton e gjysëm drogë (pa afate kohore e data të sakta sekuestrimi). Teksa shihje ilustrimet me pamje të operacionit kuptoje se ndër vite ishin sekuestruar këto sasi droge dhe dukej se operacioni kishte nisur diku nga 2016.
I nisur nga Prokuroria për Krime të Rënda në bashkëpunim me Prokurorinë e Antimafjes Italiane dhe Eurojust, ditën e sotme pas katër vjetësh kishte vetëm një ndryshim. Nuk kishte më Prokuror të Krimeve të Rënda por Prokuror të SPAK. Dhe meqënse ky ishte ndryshimi “thelbësor”, suksesin nuk mund të mos e kishte të tërin për vete SPAK. Për këtë arsye, brenda Shqipërisë këtë Operacion me dy emra duket se e përshëndetën autoritete shqiptare e diplomatë të huaj. Sicc duket me dy emra si vetë operacioni duhej të ishte dhe “suksesi”.
Nisur nga Prokuroria për Krime të Rënda, por bitisur nga SPAK, entuziazmi i ngritësve të SPAK-ut ishte i madh. Pas katër vjet e ca hetime më në fund rezultatet u përmblodhën dhe u arrit një sukses për të mirën e popullit shqiptar. Zvarritja e këtij hetimi, derisa të piqeshin kushtet për të bërë deklaratat e paradave të suksesit, popullit shqiptar i solli më shumë dëm se sa sukses. Nëse do ishin arrestuar vite më parë këta kriminelë e trafikantë kaq të rrezkishëm do kishte më pak drogë të trafikuar e sigurisht më shumë rezultate ndaj krimit. Operacioni me shumë sforco e arriti “Kulmin” sot. Me sa duket e ka merituar dhe emrin e parë “Kulmi”.
Përsa i përket emrit tjetër “Shefi”, operacioni solli atë që parashikonim, shefa të rinj në drejtësi dhe suksese të papara.
“Shefat” e reformës, pa u lodhur shumë të kuptojnë që një operacion me hetime 5 vjeccare të zvarritura tej ccdo afati procedurial, tundën flamurin e suksesit që më në fund po arrin drejtësia e re. Por…, nëse SPAK është krijuar për t’i vënë titullin dhe kapakun dosjeve të mëparshme të Prokurorisë për Krime të Rënda, paskemi gabuar në perceptim, sepse prisnim nga SPAK rezultate për peshq të mëdhenj në politikë e në krim, për të luftuar korrupsionin e qeveritarëve të djeshëm dhe të sotëm.
Nëse do duhej që të përgëzoheshin operacione të këtyre përmasave, gugëlloni në internet dhe do ta kuptoni që ndër vite prokuroria dhe policia shqiptare, ka patur shumë më tepër rezultate në një operacion të vetëm të shtrirë, mbase në pesë muaj dhe jo në pesë vjet.
Kështu, mbase kuptojmë se diplomatët e huaj ndër vite do duhej të falenderonin strukturat e drejtësisë shqiptare me shumë deklarata, por këto kanë munguar se kurrë nuk ka patur emrin SPAK struktura që ka goditur…
Sa për bashkëpunimin me Eurojust, policia shqiptare dhe Prokuroria të paktën që nga 2008 kanë patur superoperacione me një emër, por me më shumë se 37 të arrestuar…
Pa u keqkuptuar, një punë e mirë përgëzohet…, por rrota është shpikur pak më herët se Rilindja…
