Oda Dibrane ka hapur dyert e saj për artistët e ardhur nga të gjitha trevat e Shqipërisë, Kosovës, Gostivarit, Rekës dhe Malit të Zi.
Në këtë eveniment të 22-të mbarëkombëtar artistët dibranë me artin e tyre burimor si këngët, vallet dhe ritet e krahinave nga vijnë japin një frymëzim dhe gjallëri të jashtëzakonshme.
Ky festival është një mundësi shumë e mirë që u ofrohet të gjithë artistëve në mbarë Shqiptarinë për të shpalosur vlerat e tyre artistike dhe vlerat e kombit tonë.
Sivjet, për performancën më të mirë në këtë festival juria vlerësoi grupin folklorik të Prizrenit.
Oda Dibrane në gjuhën popullore simbolizon dhomën e pritjes së mikut. Ajo është simbol i vatrës së besës e bujarisë, qëndresës e trimërisë shqiptare, ku bëheshin kuvende,ceremoni në raste gëzimesh e fatkeqësish, ku shpalosej mençuria dhe urtësia e këtij populli.
Oda ka shërbyer ndërkohë edhe si vendi ku thureshin e merrnin udhë këngët e bukura epike e lirike, ku festohej e gëzohej, ku kumbonte kënga apo niste gjëma, ku pritej e përcillej miku i shtëpisë, ku përdoreshin fjalë të urta dhe dialogu alegorik.
Në këtë “Odë”, fjala kishte peshë shumë të rëndë. Jo më kot thuhej se: kur të shkosh në “Odën e Dibrës” duhet të marrësh me vete “një metër, një kandar dhe një thikë me dy presa”.
