Organizata Botërore e Shëndetësisë paralajmëron për një valë të dytë të koronavirusit që mund të përhapet në vjeshtë, prandaj i bëri thirrje shteteve të përgatiten për t’i paraprirë kësaj vale të dytë me më shumë testime si dhe programe gjurmimi e izolimi të virusit.
Dr Hans Kluge, drejtor i OBSH-së për Europën, tha se gjurmimi i kontakteve dhe izolimi i personave të prekur me Covid-19 është një strategji e mirë për të ndaluar përhapjen.
Ai tha se ka gjasa që gjatë vjeshtës të kemi një rritje të madhe të rasteve me koronavirus, në të njëjtën mënyrë si edhe rastet me grip rriten gjatë fundit të vitit.
“Ka shumë gjasa që kur të vijë vjeshta dhe të kemi gjithashtu edhe gripin sezonal, mund të shohim një efekt sezonal edhe te koronavirusi, por ndonëse s’jemi akoma të sigurtë, atëherë pritet të shohim një valë të dytë. Ndaj mësimi është që duhet të implementojmë ato metoda që ne i dimë se funksionojnë. Në thelb të kësaj është gjurmimi i hershëm, izolimi, testimi i të dyshuarve dhe, nëse është e mundur, kurimi i tyre pa paragjykime dhe stigma,” u shpreh Kluge.
