Ndihmës sekretarja amerikane e Shtetit, Victoria Nuland në mbyllje të takimeve që pati në vizitën e saj në Tiranë tha se shumica dhe opozita kanë përpara një propozim të ri lidhur me reformën në drejtësi. Flitet për një propozim hibrid nga ambasadori amerikan Donald Lu, me ide nga qeveria dhe opozita dhe mbi të gjitha është në përputhje me rekomandimet e Komisionit të Venecias. Palët po vijojnë negociatat për të gjetur kompromision.
Nuland në fund të vizitë ka thënë: “Shqipëria ka vend të veçantë në zemrën time. Kjo është vizita e katërt në Tiranë si ddihmës sekretare. SHBA-të janë krenarë që janë aleatë dhe partnerë me Shqipërinë. Reforma në drejtësi dhe negociatat po vijojnë. Reforma është tejet jetike për të ardhmen e demokracisë shqiptare, i jep fund kulturës së pandëshkueshmërisë. 91% e shqiptarëve e kërkojnë reformën në drejtësi. Ambasadori Lu ju ka bërë një propozim të ri palëve për reformën. Negociatorët nga të dyja palët kanë punuar fort. SHBA dhe BE janë krenarë që kanë ndihmuar në këtë proces. Propozimi i ri është hibrid me ide nga qeveria dhe opozita dhe në përputhje me rekomandimin e Komisionit të Venecias.”
