Përmes një postimi në facebook, deputeti i Partisë së Lirisë, Petrit Vasili, ka kërkuar shkrirjen e Bordi të Transparencës në mënyrë që sipas të tij të ndalet vjedhja e qytetarëve përmes çmimit abuziv të naftës. Vasili ka publikuar dokumentet që tregojnë se pjesë e Bordit nuk është asnjë përfaqësues nga konsumatorët, por vetëm pjesëtarë të qeverisë dhe oligarkë, ata që e tregtojnë naftën dhe që kanë interes që çmimi të jetë sa më i lartë për të fituar sa më shumë.
“Asnjë përfaqësues nga konsumatorët dhe biznesi. Të shkrihet Bordi dhe të ulen Taksat, që të ndalet vjedhja e qeverisë me çmimin e Naftës! Shqiptarët po vidhen çdo ditë me çmimin e naftës, që edhe dje u rrit në 248 litri. Shikoni me vëmendje përbërjen e Bordit të Hajdutërisë, në Dokumentin origjinal, që po ju paraqes. Asnjë përfaqësues nga konsumatorët dhe biznesi, por vetëm Qeveri dhe Oligarkët e Naftës gjen aty. Po si mundet që një problem kritik, që lidhet me çmimin e Naftës vendimet t’i marrin vetë ata qe e shesin naftën, pra ata, që janë të interesuar të fitojnë sa më shumë dhe pala e dëmtuar të mos ekzistojë fare në atë Bord. Po kjo është një vjedhje kaq e qartë dhe trashë sa që as janë munduar fare ta mbulojnë nga babëzia për të vjedhur” – shkruan Vasili në facebook.
Gjithashtu Vasili kërkon nga qeveria të ndjekë shembullin e vendeve të tjera dhe të ulë taksat mbi naftën në mënyrë që të ketë ulje të çmimit.
“Të gjithë vendet kanë ulur Taksat mbi Naftën si një masë për uljen e çmimit ndaj edhe Maqedonia e Mali i Zi kanë çmime aq të ulëta megjithëse nuk nxjerrin asnjë ton naftë. Vetëm Edi Rama dhe qeveria nuk kanë ulur asnjë Taksë nga ato që rëndojnë mbi naftën, duke vazhduar të mbledhin qindra milionë euro në kurriz mundit dhe djersës së qytetarëve për të paguar inceneratorë, koncesione e tendera sekretë. Si deputet kam depozituar që gjashtë muaj më parë në 9 mars 2022 në Kuvend, ProjektLigjin për pezullimin e Taksës së Qarkullimit dhe të Karbonit, të cilin hajdutët e rilindjes e bllokojnë dhe as nuk lejojnë të diskutohet. Ka vetëm dy rrugë për uljen e çmimit të Naftës: SHKRIRJE E MENJEHERSHME E BORDIT, ULJE E TAKSAVE MBI NAFTEN” – përfundon statusin e tij Vasili në facebook.
