Bujar Nishani nuk ka ndërmend të tërhiqet nga beteja e tij kundër mazhorancës, për dekretimin e dy ministrave.
Ai i është drejtuar Gjykatës Kushtetuese me kërkesën për interpretim të nenit 98 pika 1 të Kushtetutës së Shqipërisë, lidhur me procedurat për dekretimin e ministrave të rinj.
Sipas Nishanit, “Kushtetuta nuk ka kufizuar presidentin vetëm në kontrollin formal të propozimeve të përcjella nga kryeministri, pavarësisht se gjatë Presidencave të tjera ka patur raste që presidenti ka proceduar edhe në drejtim të kontrollit substancial të propozimit, paçka se në fund ka dekretuar sipas propozimit të kryeministrit”.
Në vijim të këtij argumenti, Nishani shton se Kushtetuta nuk është shprehur në lidhje me rastin nëse kryeministri mund t’i propozojë njëkohësisht presidentit shkarkimin e një ministri dhe emërimin e një ministri tjetër.
“Kjo, situatë krijon një ngërç në procesin e emërimit/shkarkimit përfundimtar të një ministri, përsa kohë Gjykata Kushtetuese në vendimin nr. 6, dt.18.01.2002 ka konkluduar se kontrolli nga Kuvendi nuk është veç formal, por edhe substancial dhe se Dekreti nuk merr fuqi përsa kohë nuk votohet”pro” ose “kundër”.
Në këto kushte, kryeministri në respekt të Kushtetutës duhej të propozonte së pari shkarkimin e ministrit, ku presidenti në 7 ditë të nxirrte dekretin përkatës, dhe më pas Kuvendi në 10 ditë të bënte shqyrtimin e tij duke i dhënë fuqi ose jo. Veç në këtë moment do të quhej e përmbyllur procedura e shkarkimit të një Ministri.
Pas kësaj, kryeministri do të propozonte ministrin e ri dhe sërish do të vazhdonte e njëjta procedurë tek Presidenti dhe në Kuvend.
Rasti i propozimit të shkarkimit/emërimit në të njëjtën kohë nga ana e Kryeministrit mund të ishte në rastet e dorëheqjes së Ministrit, ku termi i duhur mund të ishte “lirim nga detyra””, thuhet në kërkesën dërguar Kushtetueses.
