Bashkia e Tiranës ka nisur ndërtimin e urës së Mënikut në Ndroq, çka do të shërbej për 1.200 banorë për të tregtuar prodhimet e tyre bujqësore. Kryetari i Bashkisë së Tiranës, Erion Veliaj theksoi se ky është një tjetër premtim i mbajtur.
Veliaj shtoi se ura do t’i shërbejë banorëve për të qenë më afër shërbimeve drejt Tiranës, si dhe do të ndihmojë banorët e Mënikut që të mos preken dhe të mos vuajnë pasojat e emergjencave apo kapriçot e motit.
Ai përsëriti edhe një herë thirrjen se nisur nga situata e të ftohtit që ka përfshirë vendin, qytetarët të bëjnë kujdes deri në kalimin përfundimtar të kësaj emergjence.
“Më e keqja ka kaluar, por kemi edhe dy ditë të vështira, ndaj do ju kërkoj qytetarëve mobilizim për këto dy ditë të fundit të këtij moti të acartë. Do vazhdojmë ta bëjmë edhe në ditët në vijim, megjithatë na duhet që dhe këto dy ditë, me solidaritet, dashuri, përkushtim, për të mbyllur me sukses menaxhimin e një krize ndoshta nga më të rrallat e qytetit të Tiranës, për shkak të motit dhe gjithë kushteve atmosferike!”, – tha Veliaj.
