Takimi mes kryeministrit Edi Rama dhe homologut grek Kyriakos Mitsotakis i mbajtur mbrëmjen e djeshme në Athinë ka pasur kryefjalë marrëdhëniet dypalëshe si dhe perspektivën europiane të Shqipërisë.
Zyra e shtypit të kryeministrit grek ka zbardhur detaje nga takimi, ku thuhet se është diskutuar për bashkëpunimin e dy vendeve brenda NATO-s, dhe për pakicat greke në Shqipëri, të cilat janë cilësuar nga palët si urë miqësie dhe bashkëpunimi mes dy vendeve.
Gjithashtu kryeministrat kanë folur për integrimin e shtetasve shqiptarë në Greqi, ndërsa theksi është vënë në forcimin e marrëdhënieve ekonomike dhe tregtare.
Po ashtu ata kanë rënë dakord të punojnë së bashku në mënyrë që të dy vendet të zgjidhin sa më shpejt çështjet e lëna pezull.
