Ditën e nesërme do të zhvillohet mbledhja e Këshillit Politik, pas dakortësisë mes maxhorancës dhe opozitës jashtëparlamentare për diskutimin e ndryshimeve kushtetuese.
Forcat politike në vend pranuan të diskutojnë në tavolinë dy ndryshime të rëndësishme kushtetuese të iniciuara një prej opozitës në Parlament dhe një prej Partisë Socialiste.
Më konkretisht bëhet fjalë për hapjen e listave zgjedhore, një kërkesë e opozitës parlamentare që u la jashtë marrëveshjes së 5 qershorit për reformën zgjedhore. Kryeministri Edi Rama e mbështeti këtë kërkesë, por shtoi edhe një të tijën, atë të heqjes së koalicioneve parazgjedhore.
Reagimi i të ashtuquajturës opozita e bashkuar, ishte i fortë, me pretendimin se këto ndryshime kushtetuese, të njëanshme sipas tyre, minojnë demokracinë në vend.
Por palët pranuan më në fund t’i diskutojnë në Këshillin Politik, ku ditën e nesërme në orën 11:00 do të marrë pjesë edhe kryeministri Edi Rama.
Përveç Oerd Bylykbashit nga PD, dhe Petrit Vasilit nga LSI, opozita jashtëparlamentare ka shtuar në listën e pjesëmarrësve edhe Gazment Bardhin.
Ndërsa në vend të Rudina Hajdarit, opozitën parlamentare do ta përfaqësojë Myslim Murrizi.
