Komisioneri për Zgjerim në BE, Johannes Hahn u bën thirrje të gjitha vendeve të BE-së që të vendosin pozitivisht për hapjen e negociatave për Shqipërinë dhe Maqedoninë e Veriut por jo në mënyrë të menjëhershme.
Në një konferencë e përbashkët me kryeministrin maqedonas Zoran Zaev në Bruksel, zyrtari i lartë europian theksoi se nuk kërkon hapjen e menjëhershme të bisedimeve, por vetëm dritën jeshile, pasi nëse pengohet, kjo do të cënonte kredibilitetin e BE-së në vendet e Ballkanit.
“Uroj të ketë një marrëveshje për të bindur vendet skeptike. Bëhet fjalë për bashkëjetesën në Europë të këtyre vendeve. Maqedonia mund të bëhet një anëtare e mirë e BE-së dhe kjo mund të jetë një shenjë e mirë për vendet e tjera që po ndërmarrin reforma. Nuk duam të humbasin asnjë kredibilitet në asnjë vend të botës. E përsëris, nuk kërkojmë çeljen e menjëhershme të bisedimeve. U kërkoj liderëve të japin dritën jeshile. Do të bisedojmë me liderët e tjerë të BE-së për të pëmirësuar metodologjinë tonë. Por duhet të vazhdojmë me proçesin e zgjerimit. Kjo do të cënonte kredibilitetin tonë të vendet e tjera”, u shpreh Johannes Hahn.
