Sekretari i Përgjithshëm i Partisë Demokratike, Gazmend Bardhi, ka reaguar pas nismës së qeverisë për t’i dhënë të drejtë Policisë së Shtetit të përgjojë personat e dyshuar, pa autorizimin e Prokurorisë apo pa vendim Gjykate.
Përmes një statusi në “Facebook”, Bardhi shkruan se kryeministri Edi Rama po e zëvendëson shtetin ligjor me një regjim policor, në shkelje të Kushtetutës.
“Ligji për përgjimin e qytetarëve nga Policia, pa autorizim të prokurorisë apo pa vendim të gjykatës, po minon rrugën europiane të Shqipërisë”, shkruan Bardhi.
Postimi i Gazmend Bardhit
Edi Rama po zëvendëson shtetin ligjor me një regjim policor, në shkelje të Kushtetutës dhe në dhunim flagrant të të drejtave të njeriut.
Ligji për përgjimin e qytetarëve nga Policia, pa autorizim të prokurorisë apo pa vendim të gjykatës, thellon sjelljen antidemokratike të Edi Ramës dhe minon seriozisht rrugën europiane të Shqipërisë.
Për Partinë Demokratike ligji është antikushtetues dhe i papranueshëm.
