Stefanos Gjika ka qenë njëri nga përpiluesit e marrëveshjes të kufirit detar të Greqisë me Shqipërinë, e cila u nënshkrua nga Lulzim Basha në 27 prill 2009.
Nga Arben Llalla
Deputeti i partisë greke “Demokracia e Re”, Stefanos Gjika që kërcënoi Shqipërinë për veto në procesin e anëtarësimit në Bashkimin Europian, pasi u prishën disa ndërtime pa leje në Dhërmi, nuk është një figurë e panjohur për shqiptarët dhe Shqipërinë. Ai disa herë qysh nga viti 2009 ka kërkuar veto nga Greqia për anëtarësimin e Shqipërisë në BE, sepse kërkon që të shpallet Autonomia e Veriut të Epirit (aneksimi i jugut të Shqipërisë).
Stefanos Gjika ka qenë një nga gjeneralët e lartë të flotës detare të ushtrisë së Greqisë. Ai në vitin 1991 ishte drejtues i Fregatës “Limnos”, F-451. Nga viti 2000-2003, përfaqësues diplomatik i Greqisë në selinë e NATO-s në Bruksel. Gjatë kësaj periudhe ishte përpilues i bashkëveprimeve të NATO-s me Bashkimin Europian. Në vitin 2003-2004, komandant i Fregatës “Salamis”, F-455.
Pasi erdhi më 2004, në pushtet “Demokracia e Re” e udhëhequr nga Kosta Karamalis, Stefanos Gjika nga viti 2004-2007, ishte drejtori i shtypit dhe zëdhënësi i Ministrisë së Mbrojtjes së Greqisë. Stefanos Gjika ka qenë njëri nga përpiluesit e marrëveshjes të kufirit detar të Greqisë me Shqipërinë, e cila u nënshkrua nga Lulzim Basha në 27 prill 2009.
Kur u hodh firma për këtë marrëveshje në Tiranë në prill 2009, gjenerali i flotës greke, Stefano Gjika bashkë me oficerin e lartë të aviacionit grek, Spilio Spilotopulo kryen një takim me kryepeshkopin e Shqipërisë, Anastasin. Se çfarë lidhje ka kryepeshkopi i Shqipërisë me këta dy ushtarakë të lartë grekë, kjo mbetet ende enigmë.
Më 22 maj, deputeti Stefanos Gjika iu drejtua me pyetje ministrit të jashtëm grek Nikos Koxhas: A do të kushtëzohet pranimi i Shqipërisë në BE me kushtin e riaktivizimit të marrëveshjes së kufirit detar të nënshkruar më 27 prill 2009 nga qeveria e shkuar?
Fill pas kësaj pyetje që ish-gjenerali, sot ligjvënës, Stefanos Gjika i kërkoi ministrit të jashtëm vendosjen vetos ndaj procesit të anëtarësimit të Shqipërisë në BE, nëse nuk riaktivizohet marrëveshja e kufirit detar midis dy vendeve e vitit 2009. Gazetat u mbushën me shkrime që Greqia do bllokojë Shqipërinë të anëtarësohet në BE, ashtu siç ka bllokuar deri tani anëtarësimin e Maqedonisë në NATO. Më tej, kjo çështje u diskutua edhe në Parlamentin Europian, ku eurodeputetja Theoharus ngriti të njëjtën çështje duke deklaruar hapur se Greqia do e bllokojë Shqipërinë e padëgjueshme.
Deputeti në fjalë, Gjika disa herë ka qenë aktiv në zgjedhjet vendore dhe të përgjithshme në Shqipëri. Ai ka shoqëruar për disa ditë kandidatin e PBDNJ për kryetar të bashkisë së Konispolit, Anastas Gudën, më 2015, si dhe kandidatin për kryetar për Bashkinë e Himarës, Fredi Dionis Belerin. Në zgjedhjet e qershorit 2017, Stefan Gjika u pa disa herë në jugun e Shqipërisë i shoqëruar nga Vangjel Dule.
