Kombëtarja jonë e futbollit është e mbushur me futbollistë kosovarë, të cilët kanë një meritë të padiskutueshme në kualifikimin tonë në Euro 2016. Ndërsa në basketboll, Kosova është e pranuar në FIBA dhe meqenëse këtë sport e kanë më të zhvilluar se ne ka filluar të preferohet nga sportistë të spikatur të këtej kufirit. Gerti Shima ka aplikuar për pasaportë kosovare dhe tashmë nuk dihet nëse do të vazhdojë të përfaqësojë Shqipërinë, apo shtetin tjetër të shqiptarëve. Sidoqoftë, basketbollisti tiranas i Sigal Prishtinës ka edhe një alibi. Tek kampionët e Ligës Ballkanike luan si i huaj dhe meqenëse në skuadër ka katër lojtarë amerikanë, një bullgar dhe një suedez e ka të vështirë të gjej hapësirë, kështu që i duhet edhe një pasaportë kosovare për t’u trajtuar si 100% shqiptar.
