Kandidati i Partisë Socialiste për Bashkinë e Shkodrës, Valdrin Pjetri ka reaguar pak minuta më parë për shpërndarjen e pankartave me nënshkrimin “Narko Valdrini Jashtë Bashkisë”.
Ai shprehet se pankartat e shpërndara nëpër Shkodër nuk përfaqësojnë interesat e qytetarëve shkodranë dhe as interesat e demokratëve të ndershëm shkodranë.
Ai rithekson se nuk është pjesë e asnjë abuzimi, pasi ai nuk ka shpërdoruar pafund fonde publike.
Reagimi i plotë:
Traktet e shpërndara natën nëpër Shkodër, organizuar nga 4-5 persona, nuk përfaqësojnë interesat e qytetarëve shkodranë dhe as interesat e demokratëve të ndershëm shkodranë.
Thjesht duan të largojnë vëmendjen nga abuzimet shumë vjeçare të bëra në Bashkinë Shkodër, dhe nuk e ndryshojnë dot faktin se pas një jave ky abuzim do përfundojë njëherë e mirë.
Valdrin Pjetri nuk është e keqja e Shkodrës. Nuk është ai që ka abuzuar dhe ka shpërdoruar pafund fonde publike. Valdrin Pjetri nuk është shkaktar i gjendjes së mjerueshme, ku gjendet qyteti i Shkodrës sot.
Në pak muaj të gjithë banorët e Shkodrës do shikojnë realitetin ndryshe, të një qyteti që do administrohet dhe menaxhohet me përkushtim dhe devotshmëri.
Qentë le të lehin, karvani ecën perpara.
Ditë më të mira do vijnë për Shkodrën dhe banorët e saj.
