Deputeti i Partisë Demokratike, Dashmor Sula, ka komentuar lajmin që po zien sot rrjetin për dorëheqjen e mundshme të Gledis Nanos si drejtor i Policisë së Shtetit. Përmes një postimi në rrjetin social Facebook ndërsa Sula nënvizon arsyet përse kërkoi mbështetjen e ndërkombëtarëve për Nanon, duke e cilësuar këtë të fundit si të vetmin pa asnjë të shkuar të dyshimtë. Ndëra thekson se është e qartë që nëse Nano largohet do të thotë që ai nuk ka pranuar të jetë i kontrolluar nga Rama. “Ai do në krye të bluve një njeri që si çdo gjë në vend ta ketë lehtësisht të kontrollueshëm. Nëse kjo nuk është pranuar vërtet nga Gledis Nano, ai do jetë shembull frymëzimi për tu mos bërë pjesë e pazareve e presioneve”, shkruan Sula.
Deputeti demokrat shkruan se puna e tij në krye të policisë ka qenë me pengesa. Sula shprehet se kryeministri nuk mund të pranojë “të ketë një Drejtor Policie që mund ti surprizojë nga dita në ditë”.
“Kur Gledis Nano u emërua Drejtor i Përgjithshëm i Policisë së Shtetit pata deklaruar se në krye të uniformave blu për herë të parë shkonte një njeri pa asnjë të shkuar të dyshimtë. Po ashtu thash që Nano nuk shkon në atë post për shkak të lidhjeve politike. Ndërkohë vetëm në fillim të muajit gusht i bëra thirrje partnerëve ndërkombëtarë që të mbështesnin Gledis Nanon në punën e tij sepse ka sfida të shumfishta. Se nuk do përballej vetëm me krimin e organizuar por edhe me mbrojtësit me pushtet të tyre. Fatkeqësisht koha më dha të drejtë. Mediat por edhe burimet e mia më konfirmojnë se Gledis Nano ka dhënë dorëheqjen e parevokueshme dhe ky veprim pritet të publikohet të mërkurën”, shkruan Sula. Ndërsa deri më tani vetë Nano nuk ka bërë asnjë reagim, përveç një deklarate nga institucioni ku thuhet se ai nuk e ka dhënë dorëheqjen.
