Nëse historia e një kombi mund të përkufizohej në një histori të vetme ajo do të ishte historia e familjes së Edita Tahirit, një vajzë e rritur me nënën nga Kukësi dhe babain nga Prizreni, sot ministre për Dialogun në Qeverinë e Republikës së Kosovës.
“Jam rritur me mallin dhe vajin e nënës time së cilës nuk iu thanë lotët kurrë”, tha ajo sot duke folur para studentëve në Tiranë e ftuar në një leksion të hapur në UET. Ajo tha se “Muri i Berlinit” i ndërtuar mes Kombit shqiptar e mbajti atë larg nga familja e saj dhe vdiq pa i parë më. Po ku jemi sot? Dy shtete, një komb. Për Tahirin, një politikane që e ka nisur angazhimin e saj herët, që në negociatat e Rambujesë, kombi shqiptar ka ardhur koha që të punojë për fuqizimin e tij dhe për të ardhmen e përbashkët. Sipas saj duhet shumë punë për të rikthyer “lidhjet e këputme” të së shkuarës dhe kjo nuk bëhet vetëm me vizita zyrtarësh të ndërsjellta. “Duhet të kemi një bashkëpunim të vërtetë dhe strategjik në të gjitha fushat. Sot ka më shumë reklamë për këtë gjë se sa esencë. Gjenerata e re duhet të kuptojë se jo gjithmonë do të jetojnë shqiptarët në 5-6 shtete të ndryshme. S’po flas këtu për patriotizëm, por për forcimin e ekonomik dhe politik të shteteve tobna në mënyrë që të vijë dita që të kemi projekte të mëdha. Nuk e vendosëm ne që të jemi kështu, ne na kanë ndarë të tjerët, atëherë ne duhet të punojmë që të forcojmë shtetet tona sot”, tha ndër të tjera ajo.
Duke folur për dialogun me Serbinë, Tahiri tha se ky dialog është normal dhe i domosdoshëm për të krijuar një fqinjësi të mirë në paqe. Ajo tha se opozita nuk e lejoi debatin në Kuvend, por se asnjë marrëveshje gjatë këtij dialogu nuk ka shkelur Kushtetutën dhe ligjet e Kosovës. Për lëshimet e bëra nga pala kosovare, ajo tha se në çdo negociata bëhen lëshime, por ajo theksoi se “nuk është bërë asnjë kompromis në kurriz të sovranitetit të Kosovës”.
