Nga Ahmet Zani
Në fshatin Gallatë të Malësisë së Kurbinit, është ende një mulli i vjetër, për të cilin legjenda thotë se aty ka bluar Gjergj Kastrioti Skëndërbeu, dora vetë gjatë betejave me osmanët.
Është një mulli mes malesh dhe quhet “Mullini Fall”, të cilin banorët e përkthejnë si “mullini falë-falas”. Legjenda tjetër që e shoqëron këtë mulli, është ajo se kur Skënderbeu largohej, e bekontë me fjalët: “Sa qofsh, blofsh! Edhe me një lot ujë, t’i gur u rrotullofsh!”
Por, realiteti tregon se bekimi i Gjergj Kastriotit nuk ka qëlluar në shenjë. Mulliri nuk funksionon prej dekadash. Për herë të fundit është restauruar në vitin 1974. Ky mulli është ndërtuar pranë përroit të fshatit duke shfrytëzuar rrjedhjen e ujit në funksion të lëvizjes së gurit për bluarje, siç ndodh me çdo të këtillë.
Banorët kanë pritur që shteti të vërë dorë, por në fakt është kujtuar sipërmarësi Fitimtar Lala.
“Po e vizitoj pas 30 vitesh Mullirin Fall, ka thënë Fitimtari, dhe jam befasuar teksa shoh vetëm rrënoja, por unë do ta rindërtoj…”
Menjëherë Fitimtari ka përzgjedhur disa punonëtorë dhe ka nisur nga punën duke ruajtur vlerat e mëparshme. Në rindërtimin e tij do të përdoren gurë dekorativë të gdhëndur, ndërsa lëndët drusore do të përpunohen nga mjeshtrat e krahinës.
