Shefa klinikash, repartesh, pediatër, psikiatër, gastrologë, stomatologë shqiptarë që kanë klinika private në pronësi të tyre në Zvicër janë bashkuar të shtunën në Cyrih, për të marrë pjesë, jo në ndonjë simpozium apo kongres mjekësh, por në një darkë të përbashkët.
Nisma për bashkimin e mjekëve shqiptarë u ndërmor nga Emine Gashaj, një mjeke e re shqiptare e cila punon në Spitalin e fëmijëve në St.Gallen
“Kam mbledhur me dhjetëra kontakte të mjekëve shqiptarë duke i bërë bashkë në një grup në “Whatsap”. Dhe kështu nisi komunikimi me nesh për të realizuar një takim të përbashkët”, thotë mjekja e re, e cila që kur ishte studente në Basel kishte synimin të bënte bashkë studentët shqiptarë të mjekësisë në Zvicër.
“Nuk ishte edhe lehtë që të kontaktohen personalisht të gjithë mjekët pa u njohur fare dhe nuk isha shumë optimiste që vijnë të gjithë”, thotë Gashaj për albinfo.ch, duke treguar se e gjithë ideja ishte spontane që të bëjë një organizim mes mjekëve që të njihen me njëri-tjetrin.
“Mjekët që vijnë nga Kosova, Shqipëria, Maqedonia, Lugina e Preshevës janë ndoshta pak më shumë të lidhur me njëri-tjetrin sesa mjekët shqiptarë që janë shkolluar këtu, sepse ka mundësi qe kane studiuar bashke apo janë kyçur njëkohësisht në sistemin mjekësor në Zvicër”, tha Gashaj.
Angiologu i vetëm shqiptar, Naim Mehmeti, shef reparti në Spitalin Kantonal në Winterthur, thotë se takime të tilla janë të mirëserdhura. “Eshtë mirë me u mbledh kështu, të paktën me dit kush është dhe ku nëpër Zvicër. Të njihemi me njëri-tjetrin duke ndihmuar sidomos ata që sapo kanë ardhur këtu, po pse mos të bashkohemi edhe me mjekët në Kosovë”, thekson mjeku me prejardhje nga Gjakova duke treguar se ka arritur të sjellë dy mjekë nga Kosova për trajnime në Zvicër.
Sido që të jetë, një statistikë që tregon numrin e mjekëve shqiptarë nuk ekziston, por ka një llogaritje nga njerëz të sektorit shëndetësor se numri i mjekëve shqiptarë në tërë Zvicrën mund të shkojë deri në 400. Shumica e tyre, mjekë që kanë emigruar nga Kosova e Maqedonia për të punuar në Zvicër.
